Persib Teu Bisa Ngamomorekeun Mitra Kukar

BANDUNG – Persib Bandung baris panggih jeung kleub ti Kalimantan Timur, Mitra Kukar. Di babak penyisihan, ieu dua tim teh memang misah grup. Persib di wilayah barat jeung Mitra Kukar di wilayah timur. Tapi kitu, Persib teu bisa ngamomorekeun, da Mitra Kukar oge kaasup tim nu kuat tur boga lolongkrang nu sarua pikeun asup ka semifinal.

Duanana kungsi panggih di dua musim. Tina tilu kali pertandingan, papada kungsi meunang, eleh, jeung sakali seri. Taun 2012, misalna wae, Persib nu harita maen di kandang teh kungsi ngaleled Mitra Kukar kalawan skor 5-0. Tapi dina taun 2013 mah,  Persib teh teu walakaya, eleh 4-2 nu harita maen di kandang Mitra Kukar. Kabehdieunakeun basa maen di kandang, Persib maen imbang kalawan skor 1-1.

Nempo catetan pertandingan kadua tim tina tilu laga samodel kitu, antukna mah duanana oge sarua boga lolongkrang pikeun asup ka semi final. Palatih Persib Djadjang Nurdjaman negeskeun, ngan dina musim ieu dua tim the teu panggih kusabab misah grup. “Mitra Kukar tim anu kuat. Sarua ngabogaan lolongkrang nu teu beda,” ceuk Djadjang di Mes Persib, Jalan Ahmad Yani Bandung, Senen (15/9).

Mun ditilik tina sisi pamaen, kakuatan Persib kaitung hade. Sababaraha pamaen bintangna loba nu nguatkeun timnas. “Kontribusi pamaen Persib kaitung alus. Kitu oge basa maranehna maraen di tim,” tegesna.

Kumaha ceuk pamaen? Galandang Persib, Makan Konate yakin, timna bisa ngaliwatan babak “8 Besar” ISL 2014. Najan kitu, ceuk Konate, ngalakonan hal eta teh lain hal gampang. Persib teu bisa maen asal-asalan, oge teu bisa maen sagawayah. Konate percaya, tim bisa meunang poin dina sajumlah pertandingan. [] Hanif Hikmatyar Awaludin | 1124050061 | Jurnalistik VB

Sumber Berita :  Tribun, Persib.co.id

Sumber Potret :  BandungOke.com

:: Praktek Mata Kuliah Jurnalistik Sunda |      Prodi Jurnalistik Fakultas Dakwah dan Komunikasi |       UIN SGD Bandung |